S’istiu chi brùsiat: Casteddu in intro de sos cabu-logos prus caldos

Su Gazetinu, martis 23 de làmpadas de su 2026

S’istiu chi brùsiat: Casteddu in intro de sos cabu-logos prus caldos – Sa Sardigna puru devet fàghere sos contos cun un’istiu semper prus caldu. A dare s’allarme est Greenpeace Italia cun sa relata “L’estate che scotta”, fata dae sos datos elaborados paris cun sos chircadores Stefano Tersigni e Alessandro Cimbelli de s’Istat. S’istùdiu mustrat chi in Itàlia sas dies de istiu cun una temperadura pertzepida prus arta de 32 grados, lìmite chi a pustis s’organismu intrat in una cunditzione de istress mannu provocadu dae su caldu, siant passadas dae su 39% de su perìodu 1991-2000 a su 62% de su perìodu 2021-2025.
Intre sos cabu-logos de Regione, Casteddu figurat intre sas tzitades prus espostas. In s’istiu 2025 sa mèdia de sas temperaduras superfitziales màssimas registradas subra s’asfaltu, sas coberturas e sos muros nch’at sobradu sos 44 grados, ponende su cabu-logu sardu a sos primos postos de sa classìfica natzionale paris cun Roma e Torinu. Est un’inditadore diversu dae sa temperadura de s’ària, ma utilosu fintzas pro descrìere cantu su caldu bèngiat assorbidu e tratesu dae sos logos urbanos. Prus moderadu est, imbetzes, su fenòmenu de sas ìsulas urbanas de calore (UHI, Urban Heat Island), chi rendent sas tzitades prus caldas in cunfrontu a sas àreas birdes e de campagna a canta. Mentres sa parte manna de sos cabu-logos italianos in su 2025 at marcadu diferèntzias prus artas de sos 6 grados, in Casteddu s’incrementu mèdiu est istadu de 3,1 grados, unu valore cunsideradu lèbiu e segundu a Bari ebbia, casu ùnicu in ue sas temperaduras tzitadinas resurtant fintzas prus bassas de cussas de sos logos extra-urbanos.

Segundu Greenpeace, su caldu meda est unu de sos efetos prus craros de sa crisi de su clima e rechedet mesuras pretzisas. Intre sas prioridades inditadas figurant sa ridutzione de sas emissiones, prus birde urbanu e interventos pro amparare sas categorias prus dèbiles. Ca su caldu no est prus ebbia una chistione ambientale, ma un’isfida sanitària e sotziale chi interessat a totus.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.