Su Gazetinu, giòbia 18 de mese de idas de su 2025

Su Gazetinu, giòbia 18 de mese de idas de su 2025

Una coa de chida de addòbios – In custa coa de chida puru s’Ìsula s’abbiatzat cun addòbios meda chi acumpàngiant a sa Paschighedda intra de mercadeddos, mùsica, cultura e ispetàculu. S’àera de Paschighedda si podet bìvere in is mercadeddos de Paschighedda abertos in logos meda comente a Casteddu fintzas a su 31 de nadale intra de su cursu de Vittorio Emanuele e pratza de Yenne, ma fintzas in sa Fiera de Paschighedda 2025; in Lodè cun sa faina “A boche tenorosa” e in Tàtari cun “Paschighedda impare”. Ma regordamus fintzas is mercadeddos de S’Alighera, Carbònia e Istintinu.

In provìntzia de Aristanis sighit “Armonias de Paschighedda” in Arruinas cun su biàgiu musicale “Paschighedda in su mundu – Logu chi andas, càntigu de Paschighedda chi ddoe agatas” sàbadu a merie, in su Tzentru sotziale, e domìnigu cun s’ispetàculu “Dindu prenu” in su salone parrochiale.

Domìnigu a merie, in Crabas, in sa crèsia de Nostra Sennora Acasagiada in Chelu, ddoe faghent su Cuntzertu de Paschighedda totu is setziones de su Coro polifònicu G.P. dae Palestrina, mentras in Santu Lussurzu ddoe at a èssere su cuntzertu de sa Polifònica Lussurzesa “Claudio Monteverdi”, in sa crèsia de Santu Pedru Apòstolu.

Logu a sa cultura cras a merie in Fordongianus cun sa serrada de su fèstival literàriu Éntula, in Biblioteca comunale, cun s’iscritore Antonio Boggio.

Cras a merie etotu, su Museu de is Giogos e Gioghitos de su connotu de sa Sardigna de Tzèpara (fratzione de Abas) incarrerat “Istentu”, sa mustra illustrada noa de Luca Tuveri, mentras in su Murats de Samugheo sàbadu a merie aberit sa mustra “Intritzos ammajadores in is Bias de sa Seda. Arte de tessìngiu de s’Àsia de Mesu e de sa Tzina”, contivigiada dae Andrea De Pascale.

In fines, in Aristanis, custu merie cumentzat s’istajone noa de prosa, dantza e tzircu cuntemporàneu de su Cedac, in su Teatru Garau, cun s’ispetàculu “Coppelia / Un ballet mécanique” intra de dantza e artes de tzircu, mentras su de sàbadu at a èssere unu merie ispetziale pro s’assòtziu fotogràficu Dyaphrama in s’Hotel Mistral de Aristanis, in ue at a abèrrere sa mustra de acabbu de annu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2024-2025 – L.R. 22/2018, art. 22.