Sos mùtuos in Sardigna

Su Gazetinu, chenàbura 26 de làmpadas de su 2026

Sos mùtuos in Sardigna – Su mercadu de sos mùtuos in Sardigna non biet cambiamentos mannos. In sos primos chimbe meses de su 2026 sas famìllias sardas ant sighidu a fàghere riferimentu a sas bancas cun pedidas prus o mancu in lìnia cun sas de s’annu in antis, imbetzes abarrat crara sa preferèntzia pro s’interessu fissu, mancari si fatzas istrada un’atentzione prus manna a cara a sas fòrmulas variàbiles e mistas.

S’andamentu lu fotògrafat s’Osservatòriu Facile.it – Mutui.it, chi narat chi intre su mese de ghennàrgiu e su mese de maju sa summa mèdia pedida in Sardigna s’est positzionada in 126.931, un’importu istàbile in paragone a su 2025 ma semper prus bassu de sa mèdia natzionale, chi est de 139.230 èuros.

S’anàlisi territoriale ponet in evidèntzia diferèntzias intre sas provìntzias. Casteddu est s’àrea in ue si bi registrant sos importos mèdios prus artos, cun 133.842 èuros, sighida dae Tàtari cun 123.313 èuros. Prus bassas, imbetzes, sas summas pedidas in Nùgoro chi sunt de 113.753 èuros. Serrat sa classìfica regionale sa provìntzia de Aristanis, cun 111.870 èuros.

Abarrant in pràtica invariadas finas sas caraterìsticas de sos immòbiles comporados cun finantziamentu. Su valore mèdiu de sas domos in ue si pedit su mùtuu si positzionat in 183.675 èuros, imbetzes s’edade mèdia de chie lu pedit est abacada unu pagu, passende dae sos 42 annos prus o mancu in su 2025 a sos 41 registrados ocannu.

In contu de sas tipologias de finantziamentu, s’interessu fissu sighit a dominare sas preferèntzias de sos sardos gràtzias a una seguresa prus manna pro s’importu de sas ratas. A su matessi tempus, però, creschet su nùmeru de chie detzidet de puntare in s’interessu variàbile o mistu: in un’annu custas fòrmulas sunt passadas dae prus pagu de s’1% a su 5,9% de su totale de sas pedidas.

Unu signale chi mustrat sa situatzione de sos tassos de interessu cambiada e una tendèntzia prus manna in sas famìllias a valutare solutziones diferentes, mancari tenende un’ategiamentu caraterizadu dae prudèntzia.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.