Su Gazetinu, martis 30 de làmpadas de su 2026
Sa Sardigna sufrit pro su caldu – Sa Sardigna est in su grofu de su caldu africanu. Sas temperaduras chi imbatent a 40 – 41 grados in sas zonas internas e notes tropicales cun mìnimas de 24 grados, sunt provende sa gente, sos ispidales e sos servìtzios.
Sa Protetzione tzivile mantenet alta s’atentzione in custa situatzione definida “multirischio”: a su caldu meda s’agiunghent sos temporales, a bortas fortes meda, e sas cunditziones chi faghent partire fogos peri sos buscos. Sa coa de chida passada, a merie, màssimu in sas zonas de s’internu, b’at istadu gràndine, bentu forte e abba meda, in carchi casu superende sos 40 millìmetros in pagas oras. Unu muntone de eventos chi rendet ancora prus difìtzile sa gestione de sas crititzidades.
Su diretore generale de sa Protetzione tzivile, Mauro Merella, at avèrtidu sìndigos e tzitadinos a non trascurare sos avisos de crititzidade. “Su còdighe grogu”, ammentat, “non cheret nàrrere chi sos fenòmenos sunt lèbios o prus pagu fortes, ma ebbia chi sos fenòmenos sunt localizados”.
Su caldu est causende disàgios fintzas in sos ispidales. In s’ispidale oncològicu Businco de Casteddu est istadu torradu a ativare s’impiantu de climatizatzione, a pustis de su guastu chi in sas dies passadas aiat lassadu malàidos e operadores afrontende su caldu meda.
Fiant intervènnidos fintzas sos carabineris de su Nas e su Spresal. Sa presidente Alessandra Todde at cunfirmadu chi a garantire curas in logos adeguados est unu diritu de sos malàidos.
Crititzidades assimigiantes fintzas in S’Alighera, in sos ambulatòrios Asl de carrera degli Orti: s’impiantu nou de conditzionamentu, postu dae pagu tempus, sas dies passadas at dadu problemas cando l’ant allutu. Isetende de pònnere totu a postu, s’azienda sanitària at postu conditzionadores portàtiles in sas salas de isetu e in sos ambulatòrios in ue b’andat prus gente.
Maria Giovanna Serchisu
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
(Associated Medias) - Tutti i diritti sono riservati